Pambukak Kato

       Kaganti siriah nan sakapua, umpamo rokok nan sabatang, tacinto bajawek tangan jo dunsanak nan basamo. Kok untuang pambari Allah, sabab ba alah dek baitu, aluran badan diri ambo, tantangan tulih manulih jo tanggung jawab dalam diri, aka singkek pandapek kurang, ilimu di tuhan tasimpannyo, 
tapi samantang pun baitu, dek ujuik manantang bana, jan kalah sabalun parang, dipabulek hati nurani, indak nan labiah dari untuang, walau ka angok-angok ikan, bogo ka nyawo-nyawo patuang, patah kapak batungkek paruah, namun nan niek dalam hati, mungkasuik tatap basampaian. 
Awa mulo rundiang disabuik, samo mangikuik kato nabi, samo manyarah pado Allah, Alah ta’ala kayo sungguah, rasul tuhan nabi Muhammad, ikutan kito hamba Allah, dek yakin hati kadapek, pangana indak bacabang, ambo ansua marombak bagulambek, hanyo harapan dari ambo, kapado dunsanak kasadonyo, kok kurang rancak blog nan kami buek ko, kok basuo kalimaik nan indak jaleh, kok pasilitas nan apo adonyo, usah dicacek langkah sumbang, hanyo masukan nan kami mintak, 
sabab baitu kato ambo, ambo lah maraso yakin, sadonyo dunsanak nan mancaliak blog iko, nan bak pitua DC 8, nan pandai salawaik dulang, dalam nagari Saruaso, tolan bakahandak tabu nan manih, tabu tibarau nan ado dek ambo, pado manjadi upek puji, nan bedo jatuah dihimpok janjang, nak jan barek ka akitaik, ambo nan mintak dima'afkan.